Ծաղիկ ես

Բառերը և երաժշտությունը՝ Մանոլիս Ֆամելլոս (Μανώλης Φάμελλος)։


Ծաղիկ ես, սակայն
Հողում չեն թաղված արմատները քո,
Դառնում ես երգ, ձայն,
Տանում քայլելու անձրևի ներքո՝

Գիշերս ես խոր՝ գաղտնիքներում

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Նիկոս Անտիպաս (Νίκος Αντύπας),
Առաջին կատարումը՝ Խարիս Ալեքսիու (Χαρούλα Αλεξίου)։


Մրսում էի ես՝ մարմինս ծածկվեց
Աչքերիդ զույգ կոպերում,
Ծարավում էի՝ ընկղմվեցի
Ծիծաղիդ զով ջրերում։

Ճերմակ շապիկը քո

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Նիկոս Անտիպաս (Νίκος Αντύπας),
Առաջին կատարումը՝ Խարիս Ալեքսիու (Χαρούλα Αλεξίου)։



Թող մնա ճերմակ շապիկդ,
Իմ անկողնուն, երբ գնաս,
Որ այն կրեմ մաշկիս վրա
Գիշերներում, երբ չկաս։

Յոթը գավաթ

Երաժշտությունը՝ Էլենի Զիոգա (Ελένη Ζιώγα),
Բառերը՝ Էվանթիա Ռեբուցիկա (Ευανθία Ρεμπούτσικα)։


Տեսնեմ քեզ
Ոսկե օղեր կրելիս,
Ամենուր հազար
Զարդով փայլելիս։

Քո մազերին՝ ալիքներ,
Քո փեշերին՝ համբույրներ,
Երազներում՝ լուսնի լույսով
Պատկերներ։

Էլ չեմ սիրի ոչ մեկին

Երաժշտությունը՝ Մանոս Լոիզոս (Μάνος Λοΐζος),
Բառերը՝ Լևտերիս Պապադոպուլոս (Λευτέρης Παπαδόπουλος)։


Ուրախության իմ բաժինը
Օտար մարդիկ խլեցին,
Երբ ես ունեի մաքուր ձեռքեր,
Եվ սիրտս էր մեծ ու անգին։

Ամենը քեզ համար է գրված

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Յորգոս Դալարաս (Γιώργος Νταλάρας)



Բառերը, որոնք դուրս են երգերից
Սառում են ահից գիշերվա մթնում,
Ապաստան հայցում ծաղիկների մեջ
Եվ քեզ պես սիրված ամենքի սրտում։

Ով ազատ էր և գեղեցիկ

Բառերը՝ Մանոս Էլևթերիու (Μάνος Ελευθερίου),
Երաժշտությունը՝ Ստավրոս Կույումցիս (Σταύρος Κουγιουμτζής)


Ընկերներս, որոնց կորցրի, այլևս չկան իմ կողքին,
Նայում են հին երկինքներին, ապրում՝ կյանքի սահմանին։
Եվ գնեցին կանխիկ կյանքով երազները, որ տեսան,
Վճարեցինք մենք էլ իրենց, որ մեր աչքին չերևան։

Թե իմաստ ունի

Բառերը և երաժշտությունը՝ Խարիս և Պանոս Կացիմիխաս (Χάρης & Πάνος Κατσιμίχας)


Ինչպե՞ս սպառեցինք տարիները մեր,
Եվ ինչպե՞ս անցավ արդեն չորս ձմեռ,
- Սեր իմ անհաստատ, սեր խելակորույս, -
Դրանք ուսերիս կշռում են դարեր։

Դու մենակ ես եղել միշտ

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Տասոս Կարակացանիս (Τάσος Καρακατσάνης)


Դու մենակ ես եղել միշտ՝
Նման գաղտնի բալլադի,
Գաղտնի ստացած վերքի պես
Բարձիդ կրկին մենակ ես։

Կյանքում՝ մենակ...

Ալիք առ ալիք

Բառերը՝ Խրիստոֆորոս Բալաբանիդիս (Χριστόφορος Μπαλαμπανίδης),
Երաժշտությունը՝ Խրիստոս Նիկոլոպուլոս (Χρήστος Νικολόπουλος),
Առաջին կատարումը՝ Խարիս Ալեքսիու


Այս երեկոյին ամեն ինչ կանչում ու աղաչում է քեզ՝ դարձիր դու կրկին,
Ամենն, ինչի մեջ մեր հետքն է ապրում՝ հին մեղեդու պես երգում է մտքիս։
Այս երեկոյին մեր վառ օրերից պատմում են բոլոր պահերը անգին,
Եվ ես՝ կարոտում գաղտնիքդ կորած, քո համբույրներն եմ կանչում երազիս։

Մինորն այգաբացի

Բառերը՝ Մինոաս Մացաս (Μίνωας Μάτσας),
Երաժշտությունը՝ Սպիրոս Պերիստերիս (Σπύρος Περιστέρης)



Լսիր մինորն այգաբացի,
Հոգիս, զարթնիր խոր քնից.
Քեզ համար կա մի մեղեդի՝
Հոգուս արցունքից։

Ուրվականները

Բառերը և երաժշտությունը՝ Մանոլիս Ֆամելլոս (Μανώλης Φάμελλος),
Կատարումը՝ Յորգոս Դալարաս (Γιώργος Νταλάρας)


Գիշերն ամբողջ երկու տառ իսկ չգրեցի,
Թուղթը վերցրի ու խարույկին հանձնեցի,
Եվ նայելով կրակներին՝ ես հիշեցի քո մասին,
Վեր կենալով՝ մոտ գնացի ու տրվեցի կրակին։

Իմ մեծ աչքեր

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Յորգոս Զամպետաս (Γιώργος Ζαμπέτας)



Իմ մեծ աչքեր,
Տխուր աչքեր,
Ես ըմպում էի կաթիլ-կաթիլ
Ամենախոր գաղտնիքը ձեր։

Գետնին

Բառերը՝ Լինա Նիկոլակոպուլու (Λίνα Νικολακοπούλου),
Երաժշտությունը՝ Ստամատիս Կրաունակիս (Σταμάτης Κραουνάκης)


Ալիքների ափին հեռու իմ պալատը կկերտեմ
Եվ կդնեմ սիրամարգեր ու շղթաներ դարպասին։
Կապույտ ծովի հատակը խոր մահճակալս կնետեմ,
Որովհետև սերերս բոլոր տարիներս այրեցին։

Ընկերներիս առավոտը

Բառերը՝ Խարիս Ալեքսիու (Χάρις Αλεξίου),
Երաժշտությունը՝ Խարիս Ալեքսիու (Χάρις Αλεξίου),
Կատարումը՝ Խարիս Ալեքսիու (Χάρις Αλεξίου)



Ահա ծիծաղ։ Ելնում են վեր,
Ընկերներս են առավոտյան դառնում տուն,
Թևերի տակ ու ձեռքերում՝ գարեջրեր,
Անցնում են իմ դռան մոտով ու երգում։

Խինդս՝ մի կաթիլ

Բառերը՝ Ստավրոս Կույումցիս (Σταύρος Κουγιουμτζής),
Երաժշտությունը՝ Ստավրոս Կույումցիս (Σταύρος Κουγιουμτζής)


Կպատմեմ նորից
Անցած օրերից,
Տրտմությամբ սիրած
Ցավոտ երգերից։

Խինդս՝ մի կաթիլ,
Բայց եթե դու գաս,
Բոլոր կաթիլներն ժպիտիս՝ անմաս
Կպատարագեմ. կհանգստանաս…

Մոլորվեցի

Բառերը՝ Յաննիս Թեոդորակիս (Γιάννης Θεοδωράκης),
Երաժշտությունը՝ Միկիս Թեոդորակիս (Μίκης Θεοδωράκης)



Ես մոլորվեցի
Փողոցներում, որոնք կապեցին կյանքս
Ոլորաններին ու նավահանգիստներին...

Մռայլ երկինքներ

Բառերը՝ Ստավրոս Կույումցիս (Σταύρος Κουγιουμτζής),
Երաժշտությունը՝ Ստավրոս Կույումցիս (Σταύρος Κουγιουμτζής),
Կատարումը՝ Յորգոս Դալարաս (Γιώργος Νταλάρας)


Երկինքն է մռայլ հոսում՝ ծովացած կյանքիս վերևում,
Քո հուշը մնաց մեկընդմիշտ դաջված հոգուս խորքերում։

Եվ չունեմ աչքեր՝ ես քեզ տեսնելու, ու սիրտ՝ խոսելու,
Ձեռքերս մեռյալ կախված են անուժ՝ քեզ չեն գրկելու։

Ախ, ծիծեռնակ իմ

Բառերը՝ Լևտերիս Պապադոպուլոս (Λευτέρης Παπαδόπουλος),
Երաժշտությունը՝ Մանոս Լոիզոս (Μάνος Λοΐζος)։


Ախ, ծիծեռնակ իմ, ինչպե՞ս կթռչես
Դեպի սև երկինք,
Ուր արևմուտից արյուն է կաթում...
Դու կողբաս, դառը կողբաս
Ախ, ծիծեռնակ իմ...

Տխուր են բոլոր գիշերները քո

Բառերը և երաժշտությունը՝ Վասիլիս Ցիցանիս (Βασίλης Τσιτσάνης), Վլախոս (Βλάχος)


Տխուր են բոլոր գիշերները քո,
Գիշերներն անքուն՝ տրտում մտքերում,
Պատմիր ինձ կրկին քո ցավի մասին,
Թե որքան արցունք կա քո աչքերին։

Ագրիջենտո

Բառերը և երաժշտությունը՝ Յորգոս Զիկաս (Γιώργος Ζήκας)
Կատարումը՝ Յորգոս Դալարաս (Γιώργος Νταλάρας)


Սերս փախչում, թաքնվում է ձյուներում,
Որ չհատնի ողջակիզող ամենակուլ բոցերում...
Ու տարիներ երկար ու ձիգ, հալածվելով նրանցից,
Սերս հանգավ, ու չիմացա՝ օտա՞ր, թե՞ հին,
                                            ի՞մ, թե՞ այլոց կրակից...

Կենսագրական. Վասիլիս Ցիցանիս

Վասիլիս Ցիցանիսը (Βασίλης Τσιτσάνης, 18 January 1915 – 18 January 1984) հույն երգահան էր և բուզուկիի ցայսօր մեծագույն վարպետներից մեկը։ Լինելով ժամանակի առաջատար կոմպոզիտորներից՝ Ցիցանիսը համարվում է ժամանակակից «ռեբետիկա» ոճի հիմնադիրներից։ Գրել է ավելի քան 500 երգ։

Ծնվել է Թեսալիայի Տրիկալա քաղաքում։ Երիտասարդ տարիքից հետաքրքրվել է երաժշտությամբ և սովորել նվագել մանդոլին, ջութակ և բուզուկի. այս գործիքների համար նա ստեղծագործել է իր ամբողջ կյանքում։

Երբ հանգչում ես արծաթի...

Բառերը և երաժշտությունը՝ Վասիլիս Ցիցանիս (Βασίλης Τσιτσάνης)

Երբ հանգչում ես եթերի, արծաթի,
Եվ նվաղում կյանքիդ ուղում, մենավոր սևաչվի,
Տխրում եմ ես՝ տրտում, թախծում տարիներդ քաղցրաբույր ու դեռատի:

Թե լուսարար կիրքն աչերիդ՝ տաճարներիդ ցանկալի,
Գայթակղել է երբևէ քեզ... վիրավոր... հեզ...

Սերս պիտի բուժի խոցված երազներդ լույս օրերի,
Որ եղել են երբևէ...

Կենսագրական. Ստավրոս Կույումցիս

Ստավրոս Կույումցիսը (Σταύρος Κουγιουμτζής, 1932-2005) 20-րդ դ. հույն նշանավորագույն կոմպոզիտորներից է։

Ծնվել է Թեսալոնիկի քաղաքում 1932 թ.։ 1960 թ. գրել է իր առաջին երգը, ինչից հետո սկսել է ակտիվ ստեղծագործել ժամանակի երիտասարդ երգիչների հետ։ 60-ականների ավարտին առաջին անգամ հադիպելով այն ժամանակ 19-ամյա Յորգոս Դալարասին՝ օգնել է վերջինիս դառնալու Հունաստանի ամենանշանավոր երգիչներից մեկը։

Դու մի նեղացիր, լույս իմ աչերի

Այսպիսով՝ տեղադրում եմ այն առաջին երգը, որի արդյունքում անվերապահ սիրեցի հունական երաժշտությունը։

Դու մի նեղացիր, լույս իմ աչերի

Բառերը և երաժշտությունը՝ Ստավրոս Կույումցիս (Σταύρος Κουγιουμτζής),
Կատարումը՝ Յորգոս Դալարաս (Γιώργος Νταλάρας)։

Բացման խոսք

Արդեն մոտ 4 տարի է, ինչ բացի հունական երաժշտությունից գրեթե այլ բան չեմ լսում։ Ինքս ինձ համար թարգմանում եմ և ունկնդրում ականջիս սիրելի երգերը։ Մի պահ եկավ, երբ թարգմանությունների քանակը հասավ մի կետի, որ դարձավ ներկայացուցչական որոշակի ծավալ, ես էլ սկսեցի մտածել դրանք հայ ունկնդրին հասանելի դարձնելու և հունական երաժշտարվեստի լավագույն նմուշները դրանցով հետաքրքրվողներին ներկայացնելու մասին։